West Garo Hills District Administration ni gita re∙baenggipa October 11 oni 13 tarik ona sipai kamni a·bao napna am·giparangna coaching cum career guidance ko ong∙ate Selsella C&RD block ni ning∙o donggipa songni Narang bari bakrao skie on∙anggen. Ia skie on∙aniko pring 10 bajioni ong∙atanggen ine Selsella ni Block Development Officer (BDO) Budbar salo u·iataniko dakangaha.
Ia program ona re∙bae bakko ra∙china gita Selsella College Dokagre, Nongrum College Zekabari, Kazi Zaman College New Bhaitbari ni Principal rang, songni dilgiparang, Nokma aro VEC secretary rangko uamangni skul, college ba songni gisiko nanggipa chadamberangko ia skie on·anio bakko ra·echina didiatchina mol·molataha.
Chadamberangni sipai kamni a·bao a·songna dangdike on·e an·tangtangna janggi tangna cholko skie ra·china indakgipa nambegipa cholrango bakko ra∙china didiangaha. Unbaksana songsalo dilgiparang aro mama ada rangni songsul noksulni gisik nanggipa chadamberangna u·ie ma·sie ra·na man·agita didianiko on·anian namgipa ja·ku de·ani ong·gen ine BDO u·iatangaha.
