GHADC CEM Albinush R. Marak, NGEA dolrangna jagnini dormaharangko on·a ku∙chakgiminko da·alonaba on·kujaengani gimin Niksamso Garo Community Organisation (NGCO) sing·doataha. Batanggimin salrango GHADC o kam ka·enggipa NGEA dolrang uamangni man·a nanggipa ja 32 ni dormahako on·jaenganina jingjengatanirangko dakangaha. Uamangni jingjengatani somoio GHADC ni CEM uamangna ja gni ni dormahako on·chengna ku·rachakgenchimoba da·alonaba on·kujaenga ine uamang parakataha.
GHADC o kam ka·enggiparang bilsi 2 na batpile neng·nikanirangko chagronggenchimoba chakchike dormaha gri kamrangko ka·e on·enga. Uamangni neng·nikanirangko aro nangnikanirangko u·ichake man·a nanggipa dormaharangko aro ku·rachakgimin mangmangkode on·a nanga ine NGCO dolrang kusi ong·gijaniko parakataha.
GHADC ge·sa kamkam A·chikrangni niam rongdikko tarigipa ong·a. Iano kam ka·e cha·enggipa jatskani kosako indake dakaniara kraani ong·ja. GHADC ko mikkangchi nambatatna ku·cholsan ong·e kamrangko ka·na nanga ine NGCO dolrang ku·monganikoba on·taha.
