Selsella Dilnapara songni Laket Ch. Marak pulis dolrangni uamangko kragija doka satanina constable saksa aro adita pulisrangni kosako mokordoma ka∙doangaha. Ia ong∙a obosta September 30 attam 8:30 bajimango uni ripeng Notjeng R. Marak baksa noktangchina re∙angpilani somoio ong∙aha ine parakataha. Noktangona re∙bapilengmiting somoio uamang sakgni Selsella Apalgre dollong sepango neng·takmitingo rang∙gitik Bolero bolsa aro Gypsy bolsaoni Selsella Outpost ni Major baksa sakbri mang pulisrang re∙bae mamingkoba sing·cheng sanchenggija ja∙arango bilongbee dokaha ine u∙iatangaha.
Ia obosta ong∙ani ja∙mano Selsella community hospital ona re∙ange be∙enrangko porikka ra∙e niani ja∙mano Selsella Outpost-ona mokordoma ka∙na re∙angon uamangni mokordoma ka·aniko pulisrang ra∙chakjaha ine parakataha.
Uamangni kosako indake kragija doka satanina aro uamangni mokordoma ka∙doaniko ra∙chakjani gimin dosi dakgipa pulis dolrangni kosako niamo pangchake kraa gita sastiko on∙a nanga ine Turani Superintendent of Police na Laket Marak chitti sedoataha.
