A·chik jatrangni mongsonggipa maniani dama bol 100 ko a·bachengatgiparangoni saksa Leander K Marak be·enigita saanirangko man·e mijal attamo a·gilsakko watangaha.
Dama bol 100 Wangala Festivalko 1976 bilsi oni Rongram Block ni ning·o ong∙gipa Asanang field-o a∙bachengataha aro iako dakdilbagiparangni gisepo Marak-an a∙gilsako dongrikenggipaoni saksa kamkam ong∙achim. Iako dakdilani miksonganiara A∙chikrangni dakbewal rikbewalko ripingna aro niksengatna gita kamko ka∙ania ong∙a.
Marak aro uni ka∙rimskarang ia dama bol 100 Wangala festivalko tangka gong 5000 chi a·bachengataha. Ia manianiko bilsi 20 na batple Asanang field-o manidilangaha jekon da∙o ia manianiko ong∙atchakna tarie donkamgimin biap Chibragre Wangala a·dam ona apjitangskaaha.
Da∙alo ia manianiko a∙gilsak gimiko gipatna man∙aha aro dingtang dingtang a∙songrangoni jekai America aro Europe oni tourist-rangni re∙bae ino bak ra∙anikoba nikna gita man∙engaha.
