October jani 5 tariko Meghalaya Editors’ and Publishers’ Association (MEPA) tom∙aniko dake, YouTube rango an∙tangtangko journalist dake koborrangko parakatimgipa manderangko dilsretanina Directorate of Information and Public Relations (DIPR) na lekka sedona tik ka∙angaha. MEPA na adita journalist rangni janapatanigitade YouTube ko chalaienggipa manderang dal∙dalgipa sorkarini official programrangona re∙ange koborrangko gatatenga, press conference aro uandake gipin kobor on∙timani somoirango dongpae uamangsa journalist ni kamko ka∙skaenga ine parakangaha. Unbaksana ‘Press’ ine uamangni garirango tape re∙ruraanirangkoba dakenga ine koborrangko man∙soani bidingo MEPA u∙iataniko dakangaha.
Koborrangko parakatgipa a∙damrang dingtang mancha Registrar of Newspapers of India (RNI) o biming segatna nanga aro DIPR ni ra∙chakako man∙esa ia kamko dakna bil donga ine MEPA u∙iataha. Una agreba koborrangko parakattimgipa sakantian an∙tangtangna ID rangko media a∙damoniko mesokna nanggen ineba uamang janapangaha. MEPA ni gita DIPR baksa indakgipa neng∙nikanirangko champengna kamrangko ka∙angna gita chanchirimanganiko dakna mangsongangenga, jedakode kobor on∙timgiparangko daksninge kam ka∙enganiko aro manderangko dilsretaniko naljokatna man∙gen ine MEPA aganangaha. Iani bidingo pilak kobor on∙timgipa dolrang melie India a∙songni Chief Justice na chitti sedona tik ka∙anikoba MEPA namnikpaaniko on∙angaha.
