Garo Hills Environment Protection Society (GHEPS) dol uamangni chang 8 gipa Awareness program ko Jengjal RMSA skul noko ong∙atangaha. Ia programo bang·bea chadamberang, ma·a paarang, toromko dilgiparang, skulni skigiparang, jolni namgnina kam ka∙enggiparang jekai VNRMC, NGO unbaksana damgittam skulni chatro chatri rang bakko ra∙angtokaha.
Ia awareness program o Tura Baptist Mondolini kamoni neng·takgimin Rev. Dr. Wetterfield Marak a∙gilsakni ding∙batrikrikanichi da·alo chagrongenggipa aro mikkangchi chagrongkugnigipa obostarangni bidingo tale skianiko on·angaha. Jengjal St. Anthony’s Higher Secondary skulni Principal Rev. Fr. Lenus R. Marak rongtal an·talaniko jakkale janggi tangna nanganiko sokbagiparangna skie on·angskaaha. Jengjal jolni MDC Grahambell A. Sangma programo dongpae GHEPS dolni namgipa kamrangna mittelpile aganangaha. Una agreba bang·a program o agananggiparang buring bolgrimni gamchatani aro uarangko ripinge rakkina gisiko nanggiparang ong·china didianiko on·angaha. Bon·kamao bakko ra∙gipa sakantikon A∙chik a∙songna ku∙mikchete ra∙ani kattarangkoba mingdilataha.
