Northeast a∙jao jakkaltaitaina man∙e bijoli bikotani cholrangko chanchirimnagita ma∙mong sorkarini Ministry of New & Renewable Energy (MNRE), Meghalaya ni dilgiparang baksa tom∙aniko Delhi o dakangaha. Ia tom∙anio bijoli bikotanio jakkaltaitaina man∙gipa cholrangko NE a∙dokrangona ra∙bana aro neng∙nikanirangko ma∙sie ra∙na Power and Renewable Energy ni Minister R. K Singh a∙dokni dilgiparang baksa chanchirimangaha.
A∙dokni Power Minister AT Mondal chanchirimanio dongpae Meghalaya o indakgipa cholrangko jakkalanio nambatrorobaenganiko aro ia kamrangko ka∙na neng∙nikanirangko parakangaha. Ia neng∙nikanirangko olgrokatna saloniko bijoli bikotna Chief Minister’s Solar Mission ko a∙bachengatanikoba ua janapangaha. Mondal, Meghalaya a∙dokna aro NE a∙jarango bijoliko name man∙a nangani gamchatanikoba parakangaha.
MNREDA ni Director, Joram Beda, a∙doko Pradhan Mantri Kisan Urja Suraksha Evam Utthaan Mahabhiyan (PM-KUSUM) programko kam ka∙na neng∙nikanirangko janapangskaaha. Ua dingtang mancha ma∙mong sorkari baksa bakrime ia neng∙nikanirangko naljokatna aro saloniko bijoli bikotaniko ta∙rake ra·gatna nangnikaniko aganangaha. Una agreba ma∙mong sorkariko Solar Roof Top Scheme na tangka paisanigita dakchakaniko baridapatna, Solar Park aro Pump Storage Project ko ra∙gatna man∙ani cholrangko niatpachina janapangaha. Meghalaya o bijoli man∙aniko namdapatna ma∙mong sorkarini Power Minister ko dingtang mancha a∙dok sorkari baksa bakrimaniko on∙china AT Mondal mol∙molangjolaha.
