Garo Hills o skanggipa changna mingsing minggamako man∙gipa Meghalaya Grassroot Music Project (MGMP) ni gnigipa season ko mijal salni bako West Garo Hills a∙jani Tura Super Market-o a∙bachengatangaha. Gnigipa re∙mikkanganio a∙jani mingsinggipa dolrang jekai G-Hills Finest, Snam x Kohobodi, aro Crack Gang dolrang uamangni ring·salao changa sapani baksa dokna damna sapaniko dakmesokange manderangna an∙saoataniko ra∙baaha.
Batanggimin salo MGMP ni gnigipa seasonko Shillongo a∙bachengatanio Chief Minister Conrad Sangma iano ring·salani aro doka damanirangkosan dakaigija golpoko ja·rike dakmesokani, gitcham gitrangko ring∙ani, ka∙dingani kattarangko chadenge aganani aro gipin dakmesokanirangkoba ong∙atanggen ine janapangaha. Ian dingtang mancha a∙doktangni ring∙salanio aro doka damanio gisiko nanggipa chadamberangna cholko on∙enggipa ong∙a ineba Sangma aganangaha. Iako gnigipa changna re∙mikkanganiko a∙bachenganiara a∙doktangni chadamberangna ga∙chatani a∙damko on∙a aro uamangni dakenggipa kamo dal∙na chu·na dakchakani ong∙enga.