Mahendraganj police station ni ning∙o donggipa Tarapara songo bol badingsruke salangenggipa ML 14 5529 Bolero Pickup Sukrobar attamni 7 bajimango Civil Society A·chik Welfare Organisation (CSAWO) dolrangni rim∙aoni kate chakaha ine Secretary Damching D. Shira koborna parakataha. CSAWO doloni gariko rim∙na man·gipa a∙damo sakgittamsan ong∙ako nike adita sak songni manderang a∙sel ong·gipao dongpae uamangko dokna satna ka∙mikkenate gariko sale kataha ine Secretary u∙iatangaha.
Secretary ni u·iatanigita uamangni jako gari ong·kuengmitingo ia ong·a obostako pulis department rang baksa Mahendraganj ni Forest Range Officer na bakan ku∙silitinggita golpoate rim·gimin bolrangko ra·echina aganatahaoba gariko rakkie dona man·jaha ine parakangaha. Niamgri bolrangko den∙e pale cha∙aniara buring bolgrimko ripingna aro nosto ka·aniko champengna dongimin niamko pe∙ani ong∙a ine CSAWO dolrang aganangaha. Kate chakgipa Bolero Pickup ko sandie, nokgipa aro bol badingsrukanio jak donggipa sakantikon am∙sandie uamangni kosako raka ja·kuko de∙na nanga ine CSAWO mol∙molataha.
