A∙doko bidako skichakram dam 168 Lower Primary skul aro 101 Upper Primary skulrango porainagipa bi·sarang sak 10 mangna komie bimingrangko segatenga ine Education Minister Rakkam A. Sangma parakataha.
Indakgipa neng∙nikanirangko chagrongengon, skulrangko chipgalanichi namgniko ra∙bajawa indiba ia ong∙enggipa obostarangni ja·pangko sandiesa kam rangko ka∙na nanggen ine Sangma aganangaha. Skul nokrangni rika cho∙anirangko namdapate aro skulo chu∙ongagita skigiparangko rakkiesa kamrangko ka∙na ja·ku denagita nanggen ineba ua aganangaha.
Skulrango chatro chatrirangni komiani a∙sel skul ge·gnirangko nangdimate ka∙anichi ning∙tugipa songrangoni poraienggipa bi∙sarang chel∙begipa ramarangko aro diltugipa biaprangko re∙na nanganichi neng∙nikaniko man∙enga ineba Sangma aganangaha. Sorkarini chalaienggipa LP aro UP skulrango badita sak chatro chatrirangni segatgimin bimingrang dongani bidingo singaniko dakon, Sangma chu∙gimik koborrangko am∙sandiarangko dakani ja∙mano parakatgen ine agandapangaha.
