Israel aro Palestine a∙songni gisepo so·sojengjeng ong∙ani a·selo dontonggija dakgrik dinggrikanirang batrikrike songjinma songadamrang nosto ong∙aniko man·enga. Da∙o dipet a∙song ge∙gnini dakgrik dingrikanio komibeoba sak 1100 manderang janggiko gimaataha ine koborko man∙soaha. Ia so·sojengjeng ong∙ani October 7 tarikoni a∙bachenge da∙onaba dontongani chinrangko nikna man∙kujaenga, jeon Hamas bobil dolrang Israel a∙songona napdrabana jotton ka∙ani ja∙mano a∙bachengaha. Hamas ge∙sa Palestine a∙songo Muslim jatrangoni bobil dake chakatgipa dol ong∙a jekon Gaza songjinmao dongkame chalaianiko dakenga.
Hamas dolrangni rocket rangko watate Israel a∙songona napdrabae nosto ka∙na jotton ka∙aniko Israelni Prime Minister Benjamin Netanyahu uamangni kamna raka aganchakaniko on∙pilgen ine parakangaha. Hamas dolrang rakbegipa guarerangko pe∙drae bike aro chibimagita silchidarerang baksa napdrabae Israel a∙songko chadrapaha. Ua somoi intal dakgrikani da∙onaba batrikrikuenga aro songdongenggipa manderangni janggirangko gimaataniba tang∙dororoenganiko niknagita man·enga.
