Ru∙utgija jarangna skang mangmang taridapgipa NH-51 ramani adita bakrang nosto ong∙enganiko nikna man∙enga aro ian National Highway ko taridapanio name kam ka∙janiko mesokenga ine jolo songdonggiparang Ku∙rongdik na parakataha. Jengjal airport oni Rongramona Km 20 mang dakanggipa ramako Midras Construction company jako ra∙e taridapani kamko ka∙aha jean da∙o dikdiksa somoion nosto ong∙pilaniko nikenga.
Ia nosto ong∙gipa apsan ramaan batanggimin bilsirangoni songre songgabatgiparangna, mongsongbate gari dal∙gipa aro jregipa bosturangko salgiparangna neng∙nikanirangko on∙enga ine songni manderang parakangaha. Ia ramako taria jasani gisepon apsan dake nosto ong∙piltaianiko nikna man∙aha ine uamang company ni kamna kusi ong∙jae aganangaha. Batanggimin bilsirangni gisepo jekai neng∙nikanirangko man∙baaniko da∙o apsandaken taridapani ru∙utgijaan chagrongtainagita nangenga aro ramarang namgijanichi jolo songdonggipa manderangnaba kenbegni ong∙enga ine agandapangaha.
Ia ramako tarigipa contractor iani bidingo aganchakna gita nanga ine Aguragre aro Waribokgre jolo donggipa manderang sing∙doaniko dakangaha. Gipin biaprango mikka waanichi ramarang nosto ong∙aniko nikjagenchimoba ia ramani bakrangko name tarijani a∙sel nosto ong∙ningenga ine uamang agandapangaha.
