October 11 tariko East Garo Hills a∙jao Tribal Cooperative Marketing Department Federation of India Limited (TRIFED) aro a∙jani adita department rang jekai Prime Start-up DCIC, MBDA, MBMA aro MSRLS nangrime Tribal Artisans Empanelment Mela ko Williamnagar DRDA hall-o ong∙atangaha.
Ia programo bang∙a a∙jani jaktangchi sol∙na repna, wata chengna, sikna kona, cha∙ani tarina aro gipin jaktangchi tarigipa changgipa manderangni tarigimin bosturangko palangan baksa uamangni tarigimin bosturangko mesokanaba cholko man∙angjolaha. Ia Program ko a∙jani Additional Deputy Commissioner R. N Sangma aro Williamnagar Municipal Board ni Chief Executive Officer oprake on∙aniko dakangaha. Mela ni somoio TRIFED ni Senior Manager Nagendranath Jha scheme ni bidingo talate on∙angan baksa TRIFED ni ning∙ao dingtang dingtang ka∙gni kamrangko agantalate on∙angjolaha.
Ian dingtangmancha a∙jani manderangna uamangni jaktangchi tarigimin bosturangko mesoke mikkangchi sorkarinigita dakchakaniko on∙a miksonge cholko ra∙baenggipani bak ong∙a. Unbaksana manderangni changa sapaniko namdapatna aro jotton ka∙e chu∙sokgiparang ong∙chinaba didianiko on∙agita ia Melarangko a∙ja antion ong∙atenga.
