Meghalaya a∙dokni tang∙doanina 2028 bilsio 10 billion dollar kajina man∙a re∙mikkanganiara nam∙gipa miksongani ong∙a ine Niti Aayog ni Vice-Chairman Suman Kumar Bery mijal salni bakko adita official rang baksa tom∙e chanchirimani ja∙mano koborna parakangaha. Ia tom∙anio Chief Secretary DP Wahlang, Additional Chief Secretary Dr. Shakil P Ahmed aro Planning Departmentni adita officialrang, Suman Kumar baksa Meghalaya a·dokni tangka man·aniko tang∙doatna kam ka·angna chanchirimangaha.
Niksamsoaniko chu∙sokatnagita nisanko done re∙mikkanganiara bang∙a sorkarini kamni bakrangko dingtanganiona ra∙baa aro bon∙kamao chu∙gimik tang∙doanina dakchaka ine Kumar parakangaha. Nisan ona sokdona man∙ani ba man∙gijaniara maming gimaani ong∙ja indiba ua gadangona chu·soknagita ramarangko tarie, ka∙donge, man∙a amna re∙mikkanganisa ong∙a ine ua agandapangaha.
