Rongrongni MDC Rinaldo K. Sangma, North Garo Hills a·jao poraienggipa chatro chatrirang chubata gadango poraina aro chu·ongagita seat-rang dongjani gimin NGH a∙jani skotong songjinma Resubelpara o college gitalko kulie on·chinagita Education Minister Rakkam A. Sangmako gronge mol∙molangaha. Chittio janapatani gitade a·jao ge·sa mangmang donggipa Mendipathar college o Arts subject kosan porainagita man·aia aro poraina gita chu·onga seat-rang dongja a∙selbanga bidana rikgiparang admissionko man∙rongja ine MDC janapangaha.
A·jao bilsianti SSLC aro HSSLC porikkako pass ka·gipa chatro chatrirang sak 1500 oni 2000 mangni gita ong·ronga indiba poraichakna chu·ongagita biaprang dongjani a·selo bang·bata chatro chatrirangan chubata gadango skie ra∙na cholko man·jae skia-porani a·bao brangna nangao ga∙akronga ine ua janapangaha.
NGH a·jao chu·ongagita sorkarini skulrang ba collegerang dongjani a·sel kangal cholgrigipa manderang private college ba skulrango poraina chol ong·pajae chubata gadango skianiko man·a sikengchimoba dontongna nangronga aro bilsiantian chadamberang poraianiko dontongani batrikrikenga ineba ua janapangaha. Indakgipa obostarangni a·sel NGH a·jao ia bilsini SSLC porrikao 28.45 aro HSSLC porikkao 65.45 rangsan ong∙e a·dok gimiko komibatsranggiparangoni damsa ong·a ine janapataha.
Una agreba Shillong ni Garo Union Skul o CUET ko a·bachengatani aro NEP ko ra·gatani bidingo golporimangan baksana Shillong songjinmao A·chik chatro chatrirangna dongchake poraiani nokkoba kulie on·chinagitaba didiangaha.
