Chang 31 gipa District level National Children’s Science Congress 2023 ko South West Garo Hills a·jani Ampati Multi Facility Centre o da∙al salni bako ong∙atangaha. Ia program ko State Council of Science Technology & Environment (SCSTE) aro a∙jani District Planning Office baksa bakrime ong·atangaha.
SWGH a·jani dingtang dingtang bakrangoni ge 11 skulrang ia programo bakko ra∙angaha.
Ia programo dingtang dingtang skulni bak ra·gipa chatro chatrirang buring bolgrimko ripingani aro gamchataniko u∙ie ma∙sie ra∙na an∙tangtangni changa sapanigita noksarangko mesoke agantalate on∙angaha.
Dingtang dingtang skulni dakmesokaniko Pranab Bhowmick aro Madhusudan Saha nambatgipako baseaniko dakangskaaha. Changa sapaniko mesoke susaanio skanggipa biapo Nirupama Memorial Secondary School, gnigipao St. Dominic Savio Higher Secondary School, gittamgipa biapo St. Claret Higher Secondary School aro Okkapara Secondary School chegipa ong∙angaha. Susaanio chegipa skulrang State level Science Congress o bak ra∙na gita cholko man∙angskagen ineba tom·anio janapangaha.
