Mijal salni bako South Garo Hills a·jani Rugapara songo me·chikma dolrang songo noko aro chadamberangni gisepo churing chupekanirang bang·rorona kenchaksoe niam gri chuko palgipa biapona re·angenba churangko pakgale galaha. Cluster-level Federation ni member rang aro adita skulni chatro chatrirang bakrime uamangni songo chu palenggipa biapona re·ange chu bottle rangko seke ra∙aha.
Kulikugijagipa bottlerangko paltaipilna man∙janagita uamangni rim∙e man∙gipa churangko pake galsikaa ine koborna parakataha. Churangko donue palani batrikrikaniko champengna aro jako ra∙gipa department rangni nirok simsakgija dongani gimin me·chikma dolrang ia ja·kuko de·aniona sokangaha ine parakataha. Chu aro pekatgipa bosturangko songo noko badingsrukani a·selo chadamberangko namgijagipa ramaona dilronga aro bilsi chu·ongkugijagipa bi·sarangni janggi tanganiko nisiataona sokatronga.
