East Garo Hills a∙jani Dobu Regional Unit, A∙chik Holistic Awakening Movement (AHAM) dolrang, sorkari department rangni jolo kam ka∙aniko namdapatna nangani bidingo a∙dokni Chief Minister Conrad Sangma na chitti sedoataha.
AHAM dolrangni janapatani gitade Dobu Veterinary office ko 2019 bilsionin chalaigija galchipe donenga ine parakataha. Iachi Songsak blockni ning∙o donggipa manderang namgniko man∙a rasong grigipa ong∙a ine janape office ko chalaigenchimode jolna dakchakbeani ong∙gen ine parakataha.
Gnigipao uamang gitchambegipa Dobu PHC ko taridape on∙china didianiko dakangaha. Ia PHC ni ning∙o dam 45 na bate songrang donga aro sak hajal 15 na bate sanna bannaniko ra∙na jakkalenga ine AHAM dol parakangaha. Namgipa sanna bannani cholko man∙agita sorkariko ia neng∙nikanirangko niroke PHC oniko Community Health Centre (CHC) ona ra∙doatpachina mol∙molaniko dakangaha. Una agreba Dobu OGC ni pulis dolrang uamangni ning∙o bang∙a songrangko nirokna gita nangengon nambate nirok simsakna man∙agita OGC oni police station ni bimangona tang∙doatpachina janape mol·molataha.
Uamangni janapgimin Dobu jolni neng∙nikanirangko ta∙rakkale sorkarinigita knachake kam ka∙atpachina AHAM Dobu Regional Unit ni President Sengbath G. Momin aro Secretary Windam G. Momin jinmani palo a∙dokni Chief Minister na chittio janape mol∙molataha.
