Khasi ku∙sikkosan Eight Schedule o napataigija Garo ku∙sikkoba napatna nanganiko Gambegre ni MLA Saleng Sangma kobor ra∙timgiparangna parakangaha. Khasi Author Society (KAS) rang gitan apsan A∙chikrangoniba ku∙rangko on∙pana nanga ine ua janapangaha.
Batanggimin salo ku∙tangko Eight Schedule ni bak ong∙atna Khasirang adita MLA rang baksa Delhi ona re∙ange dabianiko nikangaha jeon A∙chik MLA rangonide Delhi ona nanganiko dabina darangba re∙anga dongja ine Sangma parakangaha.
Skotong songjinmaona re∙ange Garo ku∙sikko napatna dabianio ua pangnan chakpaaniko on∙gen ine agandapangaha. Khasirangni ku∙tangko napatna dabianio Garo ku∙sikkoba ra∙chape ku∙cholsan ong∙e re∙mikkangna dingtang mancha Khasi jatko mol∙molangaha.
Ku∙tangko Eight Schedule ni bako napatna A∙chikrangni dabigijani bidingo sing∙on Chief Minister A·chik jat ong∙ani gimin A∙chikrang uo ka∙donge dongenga ine Sangma parakangaha. Iarang pilakko nie Chief Minister kamko ka∙na nanga aro ia mamlako nigija dongaiode ua an∙tangan CM na lekka sedoatgen ine parakangaha.
