South Garo Hills a·jani Baghmara pulis dolrang am·sandianiko dake adita beng·gimin phensedyl gusu samrang baksa pekatgipa bosturangko badingsrukgipa mande sakgniko rim·aha. Uamang sakgniko auto bolsao niamgri bosturangko Dabigre oni Meata songona badingsrukna ra·angako Baghmara Reserve Gittim oniko attam 5 bajimango rim·na man·aha ine koborna parakataha.
Am∙sandianiko dake auto ning·oniko botdol 496 phensedyl gusu samrangko man·aha. Rim·ako man·gipa manderangko sing·sandianiko dakon, Dabigre songni Blue Hills jolo galchipgipa noko donggipa mande saksa bosturangko mande gipinona sokatchina gate watata ine aganchakangaha.
Uamangni agangipa biapona re·ange napdraange botdol 291 phensedyl samrangko man·dapaha jean chu·gimik 787 botdolrangko man·aha. Iani bidingo pulis dolrang mokordomako ka·angaha aro ia badingsrukani mamlao jak donggipa mongsonggipa mandeko am·sandianiko dakangenga ine parakataha.
