Prime Music Incubation Grand Finale ko da∙al attamni bako Chief Minister Conrad Sangma oprake on∙angaha jekon knal sal 10 bajioni Asanang kal∙chakramo ong∙atna tarisamsoaniko dakenga. Unbaksana re∙baenggipa Me∙gong Festival na Garo Hills ni mingsinggipa git ring∙na aro dokna damna changgipa Nokpante dolrangni dingtangmancha tarisamsogipa git “Me∙gong Bibal” koba ia programo oprake on∙angjolaha.
Ia program-ona Chief Minister mongsonggipa sokgipa ong∙e chadamberangna namgipa ku∙pattianirangko on∙angan baksana doka damanio changgipa sapgipa aro gisiko nanggipa chadamberangna dakmesokna cholrangko ra∙bana nanga ine aganangaha. A∙doko ring∙sal aro doka damani a∙bao bang∙a cholrang dongani gimin doka damani a·bao a∙palbatatna aro tang∙doatna ja∙kurangko de∙angggen ine Sangma ku∙watangaha. Unbaksana re∙anggipa bilsi gittamo a∙dokni sak 1500 mangnigita chadamberangna dam 3000 biaprango sorkari Meghalaya Grassroots Music Project (MGMP) nigitaba a∙damko on∙e cholrangko ra∙baaha ineba Sangma agandapangaha.
Ia programo adita ring·salo, doka damanio changgipa sapgiparang jekai Cherry Mrong, Do∙po, Snam X Kohobodi aro Chegim Durama dolrangni an∙saoe ring·mesokanirangkoba nikangna man∙angaha.
