Da∙al salni bako CM Elevate Programme-ko West Garo Hills, Tura ni District auditorium o a∙dok ni Chief Minister Conrad K. Sangma oprake on∙angaha. Sorkarinigita sak hajal 20 man∙a kragipa manderangna tangka paisarangchi dakchakaniko on∙e gong 300 crore tangkarangko chamanaha ine CM parakangaha.
Bading chiwalani a∙bao ia namgipa cholko ra·e biltango ga·chate janggi tangna kamrangko a·bachenge manderangna kamrangko nakatatna aro bading chiwalani a∙bao a∙dokni manderangna dakchakani ong·gen ine didie CM aganangaha. Una agreba chadambe dolrangna awareness programrangko ong·atna aro gipin skie on·anirangko dake songsalko tang·doatna sorkarioni dakchakaniko on·gen ine CM janapangaha.
Batanggimin bilsisani gisepo Meghalaya Grassroot Music Programme (MGMP) ni gita sak 1500 doke dame ring·mesokgiparangna dakchakaniko on∙angaha, iako dakanichi bang·a chadamberangni bak ra·aniko nikangnagita man∙aha ine CM parakangaha. Ia chango MGMP o ring·salani bidingosan ong·aigija, ma·gitcham pagitchamrangni golporango aro daka rikani bewalrango pangchake dakmesokgiparangnaba dakchakaniko on∙a gita miksongenga ine CM parakangaha. Ia programme rangni ning·o 50,000 hectare mangnigita buring bolgrimrangko ripingna ja·ku de·e a·bachengatna miksonganikoba CM agandapangaha.
