Da·al pringni somoio Gandrak Dare jolo Huro mangsa bijoli watgipa silbudu o nange siaha ine koborna parakataha. Wilwilao donggipa manderangni agananigitade Tura a∙bri ja∙rekni Huro rang cha·ama joljol buringrangko repakronga ine u·iataha. Bolrangoni dingdee re·bamiting somoio bijoli silbudu o rim∙dapmane ia Huro mangsa a·aona ga·ake siaha.
Huro rangni re∙ronggipa aro napakronggipa biap ong·aniko nike songdongenggipa manderang MeECL department na ua biapo bijoli silbudurangko sringjachinagita re·anggipa somoirango mol·mola dongaha ine Wildlife Divisional Forest ni Officer Rupankar Marak u·iatangaha. Apsan daken indakgipa obostarangko chagrongna nangjachinagita Upper Chandmari, Adinggre aro Gandrak Dare o songdonggipa manderangba 2021 bilsionin bijoli silbudurangko songjachina beng∙enga ine parakataha.
Re·anggipa bilsi sa atha o indakgipa a·sel ong·anio jangnangani da·o dipet ian gnigipa ong·a ine parakataha.
