October 8 tariko NEHU, Tura campus o a·sel ong·ani bidingo NEHU ko jakkandile chalaienggiparang suk ong·gijaniko parake ia a·selni kosako kakket bichalona ra·bana ta·raken ja·ku de·anggen ine parakataha. Chatro chatrirangko nirok simsake aro naljoke rakkianian uamangni mongsonggipa kam ong·an baksana indakgipa kragijagipa kamrangko poraichakram biaprango ra·chakna man·gijani ong·a ine janapangaha.
Ia a·sel ong·anio kakketgipa ja·pangko u·i ma·sinagita nambate am·sandianiko dakna NEHU nigita committee ko songangaha. Ia committee ko dilna gita School of Human & Environmental Sciences ni Dean ko donataha. Ia a∙sel ong∙ani bidingo NEHU Tura campus ona re·bae am·sandianiko dakanggen ine u·iatangaha.
Dosi dakgipa manderangko Universityni aro a·songni dongimin niamrango pangchake kragipa sastiko on·gen ine parakataha. Ia mamla ni bidingo salantio am·sandie man·aniko manderang aro kobor ra·timgiparangnaba koborrangko parakatgen ine u·iatangaha.
