North Garo Hills Mendipathar ni gital District & Sessions Court nokko Meghalaya High Court ni Chief Justice Sanjib Banerjee mijal salni bako nokdonggae on∙angaha. Ia programo Law Minister Ampareen Lyngdoh, Kharkutta ni MLA Rupert Momin, Mendipathar ni MLA Marthon J. Sangma, NGH ni Chief Judicial Magistrate Ranee M Kharsyntiew aro NGH District & Sessions Court ni Jugde B Joshi dongpae bakko ra·angaha.
Nokdonggae on∙ani somoio, mikkangchi a∙songko jatko dilangna bi·sarangni jakon ong∙a ine agane chongipa bi∙sarangni jakchi Court ko oprakate on·angaha. Chief Justice Sanjib Banerjee kachari ni gamchataniko aro uno kam ka·gipa manderangni a∙dokni manderangko niamgita chel·chakna man∙ani gamchataniko agantalate on∙angaha. Unbaksana jatni aro a∙dokni silroroanina kam ka∙anio me∙chikrangna jak on∙paanina katchaani kattarangkoba parakangaha.
