A∙dokni Agriculture & Farmers Welfare ni Minister Dr. Ampareen Lyngdoh Kharkutta ni MLA Rupert Momin baksa North Garo Hills a·jani Sarangma Horti Hub ko re∙ange niangaha. Ia biapko nina re∙baani miksonganiara game cha∙giparangna chu·ongagita ge·a gamanio nanganirangko on∙agita ong∙a ine Lyngdoh aganangaha.
Sarangma Horti Hub o gulmoris chara aro komila chararangko ge·aniko dakenga. Una agreba RIDF ni ning·o gerbera pulrangko ge∙chakna ge·gittam nok rikgipa polyhouserangkoba niangaha. Unbaksana Sambrako donggipa Integrated Bee Development Centre (IBDC) koba re∙ange niangjolaha. Ia Centreo bija jilna skie on∙ani, bija bitchiko bikotna, chekna porikka ra∙e niani aro bija jilchakani nokrangko tarina skie on∙aniko dakenga.
