GHADC ko re∙dilenggipa Executive Committee BJP party aro gipin constituency ni MDC rangko dingtange ra∙gija apsan ku·mongrime kam ka·nagita, chamatgipa tangka paisarangko nitegija suale on∙china Chief Minister Conrad Sangma ko Turani MDC Bernard Marak didiataha. Uni chittio see janapatanio ua Chief Minister ko mikkang niteaniko dontongchina didiangaha maina indake kam ka·aniara manderangna gimaaniko ra∙baa ine Marak parakataha. NPP party a∙doko BJP dol baksa nangrime sorkariko chalaigenchimoba ma∙mong sorkarioni chamatgipa tangkarangko BJP na suale on∙anio niteani dongronga ine Marak janapataha.
Marak ni agananigitade Tura constituency na gong lakh 15 ko GHADC Executive Committee chamataha ine janapangaha. GHADC ni kamrangko ka∙na gong lakh 15 kosan tikataniara Finance Commission ni niamrangko pe∙ani ong∙a ine Marak parakangaha. Tura constituency ni ning∙o dam 30 songrang dongan baksana ge∙sa dal∙begipa aro gamchatbegipa constituency ong∙ani gimin chamatgimin tangkarangko apsan sualchinagita GHADC ko Marak mol∙molangaha. Batanggimin changoba Tura na lakh 10 kosan tikataia ineba ua janapangjolaha. Unbaksana Marak GHADC na minggipin gamna nanggnirangkoba janape somoigita gamchina didiangaha.
