Tura Diocese ni bilsi 50 gapaniko re∙baenggipa November 4 aro 5 tariko Tura Don Bosco Higher Secondary Schoolni kal∙chakram biapo maniangna tik ka∙aha. Ia manianiona dingtang dingtang a∙songrangoni toromo dilgiparang re∙bana ka∙dongsoenga jeon Robibar salo a∙dokni Chief Minister Conrad Sangma salni giljao bakko ra∙anggen ine koborna parakataha.
Tura Diocese a∙bachengao dam 6 parish rang baksa sak hajal sotbri mang manderangko jakkandilbaaha. Da∙alo dam 46 parishrango sak 3.40 lakh mang manderangko re∙dilangkuenga. Ia dal∙roroniara Tura Diocese ni bang∙a gamchatgipa kamrang jekai bida pakwatani, sanna bannani aro Garo Hills na songadam nokadamni namgnina dangdike on∙aniko mesoka. Bilsi gittam mang parish ni manderangna bang∙a programrangko Covid 19 ni a∙selo ra∙bana man∙jagenchimoba, Golden Jubilee ni bilsi a∙bachenganiko 2022 bilsini April jao Walbakgre St. Luke parish o tom∙aniko dakataha. Ia dal∙gipa tom∙aniona Catholic toromo bebe ra∙gipa manderang Garo Hills ni bang∙a bakrangoni re∙bana ka∙dongsoenga ineba koborna parakataha.
