Meghalaya Energy Corporation Limited (MEPDCL) ni tangka gong 488 crore mangko National Thermal Power Corporation (NTPC) na gamna nangkuenggipani bidingo golpogrike tik ka∙enga ine a∙dokni Power Minister AT Mondal koborna parakataha. Tangkarangko gamna NTPC ni gita dam rake ra∙anichi neng∙nikaniko chagrongenchimoba grorangko chotaniko golpogrikna jotton ka∙enga ine Mondal u∙iatangaha. Gamdapna ra∙giparangko komiatna golpogrikna krengbeoba kragipa songgigrikaniko man∙kujaenga ine ua janapangaha. Iani bidingo niamko ja∙rike court ona ra∙ange niahaoba kacharini gita namgipa raiko man∙kujaenga ine ua agandapangaha.
Chu∙gimik gamna nangani 244 crore dongaoni NTPC ni bang∙a dakna nanggiparang jekai dai gamna nangani, bariatani, ja∙manchakanina gamdapna nangani aro gipin a∙selrangko ra∙gope chu∙gimik 665 crore ona sokdoangaha ine Mondal parakangaha. Indake ong∙angkuaiode gro nangani crore hajalsaonaba sokanggen, jean MEPDCL nasan ong∙aigija a∙doknaba neng∙nikaniko ra∙baenga ine ua agandapaha.
Adita chanchirimanirangni ja∙mano NTPC ni gita gamna nanganirangko 565 crore ona tang∙onataha, aro iako chang kolgrik dake gamangna tik ka∙angaha. Tangka gamanirangko komiatna NTPC baksa agangrikaniko dakangkuenga aro nambata ja∙kurangko de∙e songgigrikaniko man∙agita department kam ka∙angkugen ine Mondal parakangaha.
