All Garo Hills SSA School Teachers’ Association (AGHSSASTA) dolrang uamangna dormahako on∙kujaengani bidingo da∙al saloni jingjengatna manchigiminko dontongataha ine koborko man∙soaha. Dolni dilgiparangni aganani gitade jagnini dormaharangko October 11 tariko uamangni account ona chipatna ku∙chakgipako man∙sokujaengani gimin skigiparangni gisepo ding∙chaoani ong∙katenga ine parakataha. Indake ong∙genchimoba Shillong SPD, SEMAM office-oni October 16 tariko uamangni dormahana tangkarangko chamatahani gimin Tura songjinmao tom∙e jingjengatna miksonganiko dontongangna tik ka∙angskaaha.
SSA skulni skigiparang dormaharangko jarikit man∙jani gimin suk ong∙gijaniko parakangaha aro a∙dok sorkariko uamangni dormaharangko ta∙rake sokatchina didianikoba dakangaha. Dormaharangko watna kam ka∙aniko uamang chu∙ongnikgijako parakangan baksa sorkarini kam ka∙ani cholonko ma∙sina neng∙nike AGHSSASTA dolrang maikai dormarangko sokatna sorkari re∙chakatgen ine sing∙doangaha. Uamangni dabienggipa dormaharangko nangnika somoio man∙jaode sorkarini kosako ku∙rang on∙a jrip nie dongjawa ineba AGHSSASTA dolrang parakangaha.
