Jaipur-o ong∙atgipa Syed Mushtaq Ali Trophy T20 tournament-o Mumbai aro Meghalayani gisepgriko cricket kal∙susaanio Meghalayani sak sku wicket rangko ga·akate over 20 o chu·gimik 65 run rangkosan tarina man·e Mumbai dolchi amatako man·aha. Mumbai dolrang Indian Premier League-o kal∙susagipa aro India a·songna kal·giparang donge over 9.4 on wicket sa ko ga·akate nengrabee Meghalaya dolko amataha.
Ia kal∙susaanio Mumbai dol bisil godoanio chegipa ong·e robol gochenge Meghalaya dolrang dokchengaha jeon Mumbai dolni Chennai Super Kings IPL o kal·gipa Tushar Despande ni nambee robol goanichi Meghalaya dolni dokgiparang wicket chet ko ga·akataha. Meghalaya dolna Anish Charak aro Akash Choudhury adita run rangko tariangaha.
Meghalaya dolni tarigimin run rangko Mumbai dolni Yashasvi dokchenge 21 run rangko tarie wicketko ga·akatani ja·man Angkrish Raghuvanshi aro Ajinkya Rahane wicket ko ga·akatgija dokanichi nengrabee amataha. Changgni kal·susaanio amgijani ja∙mano re∙baenggipa Bristibar salo Mizoram baksa kal∙susana am·anio dingtanganiko nikna ka∙dongsoenga ine koborna parakataha.
