Batanggimin salo skotong Minister Conrad Sangma, Civil Hospital Tura aro Jowai ona re∙ange nirok sandianiko dakani ja∙mano sorkarini officer rangko report on∙chinagita ge∙etataha. Mijal salni bako officer rangni am∙e man∙gipa report ni bidingo Conrad Sangma adita official rang baksa tom∙e nipilaniko dakangaha aro mikkangchi ka·na nanggni kamrangni bidingo chanchirimangaha.
Ia tom∙anio hospitalrango chu∙ongagita kam ka∙giparang dongjani gimin gital dake kamna rim∙napaniko dakchina Sangma official rangko ge∙etangaha. Tura, Jowai aro Shillong Civil Hospitalrango nambata gadango bijoliko sokatna, mandena nangchongmotgiparangko tarie on∙china aro rongtal an∙talaniko ja∙rikchina Sangma aganangaha. Tom∙anio bakko ra∙gipa officialrang sanna bannaniko namdapatna aro bang∙a hospitalna nanggipa bosturangkoba janapangaha jekon CM niatna ra∙chakangaha.
