Mijal salo Vijayawada o bilsi 19 ni ning∙o ong∙giparangni cricket kal∙susaanio Meghalaya a∙dokko Delhi wicket ge·snichi amataha. Meghalaya dolni captain Avinash Rai dokchengna tik ka∙e, 33.4 over o chu∙gimik 76 run rangkosan tarina man∙aha. Gittamgipa wicket na Lensbirth N. Marak 17 aro Kshitij Singhania 11 runrangko dolna man∙e on·aha jeon 36 run-o wicket gnisan ga∙akuengaoni 76 run-o chu∙gimik wicketrangko ga∙akataha.
Robol goanio Meghalayani Shavian Blah skanggipa gochengon wicketko ra∙aha aro joljol gnigipao Bilgrak Sangma saksa wicket ko ra∙dape Delhi dolrang 7 run-on wicket gniko ga∙akataha. Indake ong∙genchimoba Delhi dolrang Tarun Bisht ni nambee 42 run rangko tarianichi chena dongimin nisanona over 7.2 on sokdoe Meghalaya dolko amataha.
Meghalaya dol Sukrobar salo Maharashtra a∙dok baksa kal∙angskagen aro knal salni bako Jaipur o, Meghalaya a∙dokni me∙asa senior dolrang Syed Mushtaq Ali Trophy T20 o Mizoram dol baksa kal∙anggen. Apsan daken Vadodara Senior Women’s T20 Trophy o Meghalaya cricket dolni me∙chikrang Pondicherry baksa kal∙angskagen.
