Re∙anggipa October 16 tariko adita Naga chatro chatrirangni dilenggipa dolrang jekai Naga Students’ Union Shillong (NSUS), Angami Elders’ Forum Shillong (AEFS), NEHU Students’ Union aro Angami Students’ Union Shillong (ASUS), NEHU Turao Naga chatro saksako kal·akani bidingo tom·e chanchirimangaha. Tom·anio NEHU ni Registrar Prof. S. R. Joshi aro ia a·sel ong·aniko am·sandina bikotgipa Fact Finding Committee ni Chairman Prof. Lucy Zehol dongpae bakko ra·angaha.
NEHU o ong·anggipa mamlako Vice Chancellor an·tangan Tura Police Station o mokordoma ka·doaha ine NSUS dolrang parakangaha. NEHU ni am·sandianiko dakna a·bachenganiara October 11 tariko NSUS ni dabiako chu·sokatani ong·a ine namnikaniko parakangaha. Uamangni tom·anio a·selo ga·akgipa chatrona minggittam lekkarangko on·china didiangaha. Mokordoma ka·gipani bichit, Fact Finding Committee ni report aro NEHU ni ia mamlako name sandie kakket bichalona ra·bae VC ni jakchi see on·chinagita tom·anio uamang didiangaha. Ia bakrimgipa chatro chatrirangni dolrang NEHU aro Tura pulisni kamo ka·donganiko parake, dosi dakgiparangko tarake kamni kri sastiko on·a nangnikaniko parakangaha.
