Selsella oni bilsi 12 ong·gipa Dipugre L.P. skul o class IV o poraigipa me·chik bi·sa Jaian Ch. Sangma sagiko ka∙namgija kal∙ake so∙otanina Selsella jolni NGO dolrang raken jegalataha. Ua me∙chik bi∙sako batanggimin October 8 tariko gimaaniko uni ma·aparang parakataha. Indake ong∙genchimoba rasonggribee October ni 10 tariko uamangni gimaenggipa demechikni manggisikosa man·skaaha ine koborna parakataha.
Jaian Sangma sagiko drae til·eke so·ote galanio Selsella Ronggramgri oni Jabeth Ch. Sangma jak donga ine pulisrang uko rim·aha. Dosi dakgipa mandeni kosako jegale uni janggi tanga gimikna patoko donate sastiko on·china Selsella jolni adita NGO dolrang raken dabiangaha. Selsella Pulisrangni dosi dakgipa mandeko rim·e donenganiko ta·rake kakket bichalona ra·bachina NGO dolrang didiangaha. Dosi dakgipani kosako sastiko on·anian uamangni songsalni niamko ja·rike manderangko naljokatanio chu·sokaniko ra·baani ong·gen ine uamang janapangaha.
Sianggipa me·chik bi·sako gisik ra·e uni nokdangni manderang baksa kalimpaaniko mesoknagita October ni 12 tariko Narangbari, Selsella o mombati so·e bi∙chakaniko dakangaha ine NGO dolrang janapangaha. Selsella ni NGO dolrang a·selo ga·akgipana kakket bichalko ra·bana aro dosi dakgipani kosako sastiko on·china ku·cholsan ong·e mikkangchi songsalo manderangko naljokatna ja·ku de·na ku·monganikoba parakataha.
