Batanggimin 2013 o Central Motor Vehicle Act 1989 o pangchake Supreme Court ni ge∙etgimingita garirango gitchakgipa light ko jakkalna sorkario dal∙batgipa officer rangnasan on∙aha. Sorkarini ning·o kam ka·enggipa dal·batgipa officer rang jekai Governor, Chief Minister, Deputy Chief Minister, High Court ni Chief Justice aro gipin dal·dalgipa dilgiparangni gari nokkingosan gitchak light ko tekna man∙gen ine HC ge·etangaha.
Supreme Court ni ge∙etgimin niamo pangchake je manderangan VIP bimung donako man∙a uamangni gariosan gitchak lightko aro siren rangko jakkalna gita man·a. Ia dongimin niamo pangchake ramram manderangni gario light gitchak teke salanirangko champengnagita dingtang dingtang department ni aro pulis dolrang ko nirokatchina gita saksa Social Activist Kingstone Bolwari a∙dok sorkarini Principal Secretary na chitti sedoataha. Ramram manderangni garirango light gitchako teke aro siren rangko gam·ate salanichi ramarango garirangko apchangket ong∙ata aro manderangna neng∙nikani on∙aoniko champengna nirokaniko dakatchinagita Marak mol∙molataha.
