July 24 tariko Turao so·sojengjeng ong·ani somoio ACHIK dolni General Secretary aro Advocate Bernita R. Marak ko rim·na ge·etaoniko Meghalaya High Court jamin ko on·angaha. October 20 tariko Justice B Bhattacharjee ni ge·etanigita Bernita ni kosako Araimile, Tura Pulis Station o mokordoma ka·anio pangchake una jaminko on·na gita tangka gong hajal kolatchi ko gamatan baksana je somoioba pulisrangni sing·sandianiko dakna okamatani somoio an·tangko choljokate aganchaknagita nanggen ine High Court ge·etaniko on∙angaha.
Mokordoma ka·ako man·gipa mande ia ong·gimin obostani kosako darang mandekoba ka·mikkenataniko dakna man·jawa aro sakgipin mandechi kam ka·draatnaba man·jawa ine High Court u·iatangaha.
High Court ni u·iatani gita am·sandianiko dakgipa dolrang so·sojengjeng ong·a bakan Marak ko rim·na jotton ka·ani maming sakkirang dongja. Unbaksana Marak ni kosako court na maming sakkirangkoba on·dapanirang dongja ine High Court agandapangaha.
