A·chikkuko Indiani constitution o Eight Schedule ni bako napatchina A·chik Holistic Awakening Movement (AHAM) dolrang a·songni Prime Minister Narendra Modi na chitti sedoangaha. AHAM dol A·chik jatni palo uamangni dabianiko niatpachina chittio see janapataha ine AHAM ni President George Prince Ch. Momin koborna parakataha.
Batanggimin bilsirango ma·mong sorkari bang·a ku·sikrangko Eight Schedule ni ning·o napataha aro ian sorkario India a·songo ku·sikrangko ripingna nama miksonganiko mesoka ine AHAM parakangaha. Uamangni janapatanigitade bang·a committee rangni dabianiko knachake ku·sikrangko Eight Schedule ni ning·o napatmanhaoba Phawa Committee (1996) aro Sitakant Mohapatra (2023) kode napata dongkuja ine parakataha. 2023 bilsio chang 93 gipa Constitution ni gital niamko ra·gatani ja·mano Bodo, Dogri, Santali aro Maithili ku·sikrangko Eight Schedule o ra·gataha. Apsandaken A·chikkuni dingtanganiko ma·sie Eight Schedule o ra·napna ka·dongsoe dingtang mancha AHAM dol a·songni Prime Minister na see mol·molataha.
A·chikkuko jakkalbaako janapangjole jringnan jatni ku·sikchi segimin lekkarangko chapa ka·enga aro serakgipa manderang donganichi ku·tangni ki·taprangko altuae man·a amma ine uamang parakangaha. Uasan ong·aigija A·chik jatni golporang, daka rika, chrok mesaani aro gitrangko India a·songni bang·a bakrango dongkamaniko nika ine uamang parakangaha. Unbaksana dal·dalgipa minggitam janerarang, ming sotbonga songbad koborrang aro jringnan chapa ka·simaigipa ki·taprang gnang ine janapataha.
A·chikkuko Eight Schedule o ra·gatna chanchianiko Indiani Parliament oba golporima dongaha ine AHAM dol parakanga. Meghalaya sorkarini ru·utgija salrangna skang Garo ku·sikko Eight Schedule o napatna janapaniko u·iate ia kamko ma·mong sorkari jako ra·e niatgenchimode A·chik jatna namgniko ra·bagen ine parakangaha. Una agreba Meghalaya a·dokosan ong·aigija Assam, Arunachal Pradesh, Nagaland aro Tripura a·dokrangoba Garo ku·sikko salanti golpona jakkalkuenga. Northeast a·doknisan ong·aigija gipin Indiani bakrangoniba an·tangtangni ku·tangna bate Garo ku·sikko dal·nike ra·enga ine uamang parakangaha. 2023 bilsini MBOSE SSLC porikkao Bihari chatro saksa Garo subject o chubatgipa gadango chu·sokanikoba janapangaha. Iasan ong·aigija a·dokni MLA rangni gisepo sak 24 A·chikrang, Khasi Hills o sakgni, Assam o saksa MLA, India o saksa MP aro Bangladesh o saksa MP donggenchimoba Garo ku·siko Eight Schedule o ra·napkuja ine AHAM dol parakangaha.
