Public Health Engineering (PHE) ni Minister Marcuise N. Marak, nokantiona chi suale wataniko PHE department ni jako on∙china a∙dok sorkari baksa agangrikaniko dakanggen ine parakangaha. Nokantiona chi sualaniko da∙o dipet Shillong songjinmana Shillong Municipal Board (SMB) aro Tura songjinmana Garo Hills Autonomous District Council (GHADC) nigitasa jako ra∙e kam ka∙enga ine Marak aganangaha.
PHE Department nigitade chirangko chimongchakram biapona sokatanikosan jako ra∙e kam ka∙enga ine ua janapanagaha. Department nigita nokantio badita chirangko nanga chu∙onge sokatna nambate u·iani gimin mikkangchi kam ka·angna dakchakani ong·gen ineba Marak janapangaha. Ia kamrangni bidingo ru∙utgija sal somoirangni gisepon Chief Minister Conrad K. Sangma aro Deputy Chief Minister in-charge Urban Affairs Sniawbhalang Dhar baksa golpogrike departmentna pakwate on∙china didianggen ine Marak parakataha.
