Da∙al salni bako East Garo Hills a∙jani District Congress Committee (DCC) ni niksenggipa dilgiparang National Peoples’ Party (NPP) baksa bakrimna sikpaaniko parakangaha. Ia dilgiparang DCC ni gitcham President Linderson A. Sangma, gitcham Chief Organizer Hercullish G. Momin, me∙chikma dolni gitcham President Serolla Ch. Sangma aro gitcham Member Organizer Lakky G. Momin ko Williamnagar ni MLA Marcuise Marak rimchaksoaniko dakangaha.
Uamangko dingtangmancha NPP dolona rimchaksoaniko daknagita dolni dilgiparang baksa chanchirime tom∙aniko dakanggen ine Marak parakataha. Uamangni NPP baksa bakrimaniara a∙dokni Chief Minister Conrad K. Sangmani dilanio namgipa kamrangko nike aro mikkangchi uni namgipa miksongarangniko niksamsoe uamang bakrimaha ineba Marak janapangjolaha.
