Tura ni A·chik Holistic Awakening Movement (AHAM) dolrang Pradhan Mantri Formulation Micro Food Processing Enterprise (PMFME) scheme na dorgastoko galna uamangni nanggipa lekkarangko bank o ra·chakgijanichi neng·nikaniko man·enga ine koborna parakataha. AHAM dolni janapatanigitade ia scheme na galanio togigiparangna kenani donga ine bank-onin manderangko ia PMFME scheme na galjachina beng·ataha.
Bank o manderangni nanggipa lekkarangko ra·chakna jechakaniko bang·a manderang AHAM dolna janapaha aro iani a·selan scheme ni namgniko man·jaenga ine uamang parakataha. Sorkari jensalo scheme rangko ra·baengon bank aro civil officialrangna u·iatna nanga ine AHAM dolrang parakangaha. Official rangni u·igijanichi a·songni aro a·dokni silroroaniko gimaatani ong·a. Indake ma·sigijanichi chadamberangko kam man·gija dongaonaba sokata ine uamang parakataha.
District Horticulture HOD ko iani bidingo niate kam ka·pachina, PMFME ko galna lekkarangko bank ni ra·chakna jechakaniko nirokate nama ja·kuko de·china Tura AHAM ni General Secretary Clinton R. Marak dolni palo mol·molataha. Togigipa ong·ani aro ong·gijaniko nama bewalo sakantina u·iate on·china aro pilak officialrangna ku·pattianikoba on·a nangenga ine AHAM rang janapangaha. Scheme ni namgnina chakpaaniko parakatan baksa sakanti chadamberang ia scheme ko man·a amgiparang ong·na nanga ine AHAM parakangaha.
