Adita changna biaprangko nie aro tom·e chanchirimanirangko dake, bon·kame mijal salni bako Turani DRDA hall o a·jani DC, District Office rang aro Wangala Committee rang, ia bilsini Wangala Festival ko maninagita District Administration Jengjal Baljek Airport ko tik ka·angaha ine koborna parakataha. Bilsianti wangalchakronggipa biap Chibragre chi napanggipa ramarang Ganol Hydro Power plant na chiko dim·penganichi batanggimin somoio chi bana ong·e nosto ong·aniko niknagita man·aha aro biapona batsotgipa dollongko man·kujana kingking dontongatna tik ka·angaha. Unbaksana wangalgipa biapona re·anggipa aro ong·katgipa ramarang apchonani a·selo neng·nikanirangko man·ronga maina bilsiantin manderangni sokbaani batroroenga ineba janapangaha.
Indake ong·engon manderang Babadam ona apjitangskana kusi ong·e ra·chakangani gisepon ua biapona re·gipa ramaba Chibragre ko napake re·na nange gitchambegipa dollongko bang·a garirang batsotani somoio a·sel ong·na nangode PWD jako ra·jawa ine aganangskaaha. Iani bidingo Sadolpara gita napatskae, Selsella aro Mukdangra gita ong·katatskana ramako District Administration aro pulis dolrangni niani somoio mikka wae rama namjabeani a·sel pulis gariko sikdona nangaona sokahani gimin Babadam ona apjitatanikoba ra·galpilaha. Una agreba P A. Sangma stadium, Allotgre, Damalgre aro Balonggre kal·chakram biaprangkoba nieani gisepon adita neng·nikanirangko man·e bon·kame Jengjal Airport an nambatgipa biap ong·gen ine tik ka·angaha.
Jengjal Baljek Airport oba samsirang bu·su dake rakgipa ong·e chrokgiparangna neng·nikaniko on·ani gimin aganengon PWD department a·arangko ra·bae name jete on·e dakchakgen ine a·kange ra·angskaaha. Mijal salni bako biaprangko name nianiko dake da·aloni kamrangko a·bachengatnaba tik ka·angaha.
