Tura ni saksa Social Activist Cherian Momin A·chikkuko Eighth Schedule o ra·napgija galchanganina uni suk ong·gijaniko parakan baksa nipiltaie kam ka·china didiangaha. Ru·utgija somoina skang Ministry of Home Affairs ni u·iatanigita Eighth Schedule o A·chikkuko ra·napjanina ku·sikrangko sea jotanichi ripingna jotton ka·enggiparang suk ong·gijaniko mesokanga. Re∙anggipa somoio Eighth Schedule na ra∙gatna am·gipa ku∙sikrangko nakatatanio A∙chikkuko galchanganina, ma∙mong sorkari aro a∙dok sorkariko iani bidingo ta·raken nipiltaie A∙chikkukoba apsan daken bak ong∙atnagita bang·a dolrang mol∙molaniko dakenga.
A·chikku ko Northeast-o sak 1.5 million mang manderang jakkala mongsongbate Meghalaya a·dokni a·ja ge·bongao salantio aganronga jean a·doko chu·gimik 33 percent mang ong·a. A·chikkuko bang·a chatro chatrirang University rango poraie ra·enga, uasan ongaigija doctorate gadangoba bang·a manderangan poraianiko dakangenga. A∙chikkuko galchanganiara lekka seaniko dake ku·tangko ripinggiparangna jajrenganiko ra·baa aro sing·doanirangko ong·katata.
Ming 38 kusikrang Eighth Schedule o napataniko man·a sengenga jekai Angika, Banjara, Bazika, Bhojpuri, Bhoti, Bhotia, Bundelkhandi, Chhattisgarhi, Dhatki, English, Garhwali (Pahari), Gondi, Gujjari, Ho, Kaachachhi, Kamtapuri, Karbi, Khasi, Kodava (Coorg), Kok Barak, Kumaoni (Pahari), Kurak aro Khasi kusikba gnang. Una agreba Lepcha, Limbu, Mizo (Lushai), Magahi, Mundari, Nagpuri, Nicobarese, Pahari (Himachali), Pali, Rajasthani, Sambalpuri ba Kosali, Shaurseni (Prakrit), Siraiki, Tenyidi, aro Tulu ku·sikrangba gnang. Da·o dipet Eighth Schedule ni ning·o ming 22 ku·sikrang donga jeon ge 14 agangipa ku·sikrangko a·bachengon ra·napmanaha. Una agreba minggipin ku·sikrangko ra·naproroangaha jekai 1967 bilsio Sindhi, 1992 o Konkani, Manipuri, Nepali aro 2004 bilsio Bodo, Dogri, Maithili, Santhali ku·sikrangko Eighth Schedule ni bak ong·ataha.
Eighth Schedule o Garo ku·sikko ranapna dabianiko ru·uta somoionin dakengaha aro niamnigita krae dabienggipa ong·a. A·chikku Meghalaya a·doko mongsonggipa ku·sikrangoni ge·sa ong∙a jean agananio aro seanio jatni dakarikao gun gnanggipa ong·a. Khasi aro Garo jatni daka rika niam retirangni gamchataniko nike November 27, 2018 bilsio Meghalaya Legislative Assembly bakrimapaaniko on·angaha jeon ma·mong sorkariko A·chikku aro Khasi ku·sikko Eighth Schedule ona ra·napchina mol·molaniko dakangaha. Unbaksana A∙chik Literature Society adita dingtang dolrangming nangrime ma·mong sorkarina A·chikkuko India a·songni Constitution ni Eighth Schedule-o bak ong·atchina memorandum ko on·angaha.