October 27 tariko Meghalaya Governor Phagu Chauhan, Captain Williamson Sangma State University Act na uni namnikpaaniko parakangaha. Education Minister Rakkam Sangma ni agananigita ia Act na Governor namnikpaaniko mesokan baksa adita ku·pattianirang aro nangnikanirangkoba janapangaha ine u·iatangaha. Governorni janapgimin ku·pattianirangko a·dok sorkari nianggen ine Sangma agandapangaha.
Captain Williamson Sangma State University ko sorkari mikkang changni pora skiani kari a·bachengao chalaina jotton ka·anggen ine Education Minister parakangaha. Search Committee ko songe University na Vice Chancellor, Registrar aro gipin kam ka·giparangko ta·raken ra·napna a·bachengatgen ineba Sangma aganangaha. Ia Act ko 2023 bilsini March jao ra·baani miksonganiara chugipa gandango skia poraiani aro technical ni a·bao dangdike on·ani ong·a. Humanities, General Sciences, Engineering, Physical Sciences, Life Sciences, Commerce, Performing Arts, Professional Sciences, technology aro gipin a·barangko poraina ia University chol on·anggen. Iasan ong·aigija gisik a·ning bite am·sandie poraigiparangna research ko daknaba cholko on·anggen ine janapangaha.
