A·dokni skulrango Mathematics ko mongsonggipa subject dake skina nanganiko Education Minister Rakkam Sangma sak 30-40 Secondary aro Higher Secondary skulni Principal rang baksa tom·e chanchirimangaha. Ia tom·anio skulni bang·a Principal rang Mathematics ko skulo mongsonggipa subjectni bak ong·ataniko nangnike Sangmana parakangaha.
Tom·anio bang·a bakko ra·giparang Maths ko mongsonggipa subject o bak dongatchina gita didianiko on·angaha aro Sangma an·tangba namnikaniko parake bang·a chatro chatrirangan Maths ko galchange dal·e ra·jaenga ine aganangaha. Unbaksana Maths subject donggija chu·batgipa poraiani gadangona re·angna kraa ong·ja ineba Sangma agandapangaha. Indiba iani bidingo kamko ka·nagita sorkari baksa chanchirimaniko dakchengesa pilak kamko ka·anggen ine Sangma parakangaha.
Maths ko mongsonggipa subject ong·atna ja·kuko de·na skang Directorate of Educational Research and Training (DERT) ko chatro chatrirangni Mathematics o name daka dakgijaniko nigrike kamko ka·chinagita ge·etaniko dakangaha ine Sangma parakataha. Tom·anio donggipa Principalrang skulni ki·taprangko dingtangatna nanganikoba Sangmana janapangaha jekon October 31 tariko Textbook Review Committee baksa tom·aniko dakgen ine Sangma u·iataha. DERT ia kamko jako ra·e ka·enga aro nanggipa ku·pattianikoba on·anggen ine Sangma agandapangaha.
