A∙dokni dingtang dingtang gadango skigiparangni dabianirangko chu·sokatna kam ka·anio a·dok sorkarini chamgimin tangka paisarangosa pangchakgen ine Education Minister Rakkam Sangma parakataha.
Meghalaya a·doko dingtang dingtang gadango skigiparang sak 55,000 mangna batpile gnang jemangni dabianirangba dingtang dingtang ong·a. Sorkari ong·e skigiparangni dabianiko chu·sokatna skani donggenchimoba uamangna sorkarini chamgimin korosrangni kosako ga·changbate kamko ka·na amja aro indakgipa neng·nikanirangko sorkari ong·e chagrongna nangronga ine Sangma aganangaha.
Federation of All School Teachers of Meghalaya (FASTOM) rang 2024 bilsini April jani gisepo a·dokni gimik adhoc skulrangko deficit ona tang·doatchina dabianiko chu·sokatchina a·dok sorkariko bon·kame dabianirangko dakangaha. Indake ong·ani gisepon uamangna mangmangsan kamko chu·sokataiode gipin gadango skigiparang jekai SSA o skigiparang jaanti dormahako sokatchina, adhoc o skigiparang deficit ong·atchina aro deficit o skigiparang uamangni kamko dingtang gadangona ra·dochina raken dabianiko dakangaona sokanggen. Skigiparangni pilak dabianiko changsano chu∙sokatna sorkarina neng·nikani ong·gen ine Sangma aganangaha.
Indake ong·engon a·dok sorkari ia dabianirangko jegalenga ong·ja, maina batanggimin bilsi bongaoba adhoc secondary gadango skigiparangni dabianiko chu·sokatan baksana pre-primary aro song·e channe dakchakgiparangni dormaharangko changgnimangna bariataha. Skigiparangko mikkango done kamrangko ka·angkugen maina uamangan chadamberangko dal·atna chuatnasigiparang ong∙a ine Sangma ka·dongani kattarangko aganangaha.
