Re·anggipa October jani 28 tariko Williamnagar songjinmao Fire Service Station ni ning·ao dongipa tangsim rongni Maruti 800, AS-01-4584 number gari bolsako walni 1 bajimango cha·uangaha ine koborna parakataha. Gari cha·uani mamlao ian batanggimin antirango gnigipa chang ong·enga ine u·iataha. Ia tangsim rongni gariko banoba nikgenchimode ta∙rake nokgipana 7641913006 numberona ka·ate u·iatpachina mol·molataha.
Da·ororo a·jao gari cha·uaniko bang·a biaprango knana man·enga jeon batanggimin chango Tikrikilla parish ni Bolero garikoba cha·uangaha. Uasan ong·aigija chaka ronggnigipa garirangkoba cha·uaniko knana man·enga. Cha·uanioni naljoke garirangko donpachina pulis dolrang mikrakataniko pangnan on·angenga. Cha·ugipa manderang mongsongbate waljatchini somoio ong·katronga jekon songni manderangni parakatanigitade jolni manderangba ia kamo bak dongpana nanga ine koborna janapataha.
