Da·al salni bako Cabinet tom·anio ming bonga nanggipa kamrangni bidingo chanchirimaniko dakangaha. Ia tom·anio skanggipa Meghalaya Pulis department o kamna rimnapani bidingo niamrangko nipiltaie ja·rikna Cabinet ra·chakangaha. Dingtang dingtang gadangni kamna jekai Sub Inspector, Armed Branch Constable aro Unarmed Branch Constable jeon Fireman aro Meghalaya Police Radio Organisation (MPRO) rangna ma·mong sorkarini dongimin niam baksa apsan ja·rike kamna rimnapna niamrangko tik ka·angaha. Batanggimin somoirango gitcham niamrangko ja·rikanichi kamna rimnapanio ru·uta somoirangko nangani a∙sel ia nipiltaigimin niamrangko ja·rike sakantina u·iatan baksa nambate aro ta·rakbataniko ra·baani ong·anggen.
Gnigipa chanchirimanio, 2023 bilsio Indian Police Service (IPS) Officer rangna seokaniko dakna departmentnigita a·dokni ning·on MPSC nigita porikkarangko ra·na tik ka·angaha jekon skango UPSC nigitasa porikka ra·aniko dakronga.
Gittamgipao Meghalaya Fisheries Service Rules, 2017 Schedule II ni Rule 16 ko adita dingtangataniko dake Fishery Science aro Applied Aquaculture ko MSc poraigipa chatro chatrirangna Rule 1 aro Rule 3 ni ning·o BFSc Graduate aro janapgimin subject o MSc course ko poraie skie ra·na ge·etaniko bak ong·atjachina cabinet ra·chakangaha.
Brigipao mikkangchi a·dokna gong crore 50 kajinako man·dapna Excise department nigita Meghalaya Excise Amendment Rules, 2021 ko adita dingtangatnagita cabinet ra·chakangaha. Unbaksana 2024 bilsio chuttirangko ja·riknagita tarianikoba tom·anio namnike ra·chakangaha.
