A∙doko sak hajal snimangna bate ASHA kam ka∙giparangko Health Minister Ampareen Lyngdoh sorkario ka∙dongchina aro sanna bannaniko champenggipa kamrangko dakjachina didiangaha. Ia kattarangko Lyngdoh, ASHA rangni kamtangtangchi re∙anggija noko donge jingjengatna tik ka∙ani ja∙mano aganangskaaha. Golpoanirangko dakangkuani bijangchio ASHA rangni ja∙ku de∙anina Lyngdoh aiao inmananiko janape uamangni dilgiparangni uko grongan somoio man∙gnirangna dabiani bidingo Chief Minister Conrad Sangma baksa golporimna November 6 tariko tik ka∙mana dongaha ine ua parakangaha.
ASHA rangni dabianiko Chief Minister baksa golporimanio maidakgipa biteko man∙gen uko agana man∙ja aro ku∙chakna man∙kujawa ine Lyngdoh aganangaha. Sak hajal 7 mang ASHA rangni dabianiko chu∙sokatna sorkari tangka gong hajal 40 crore ko nanggen ine ua agandapangaha. Iarang pilakko nigrike Lyngdoh a∙dokni ASHA kam ka∙giparangko sanna bannani kamrangko champengatgija sorkario ka∙dongchina aro jingjengatgipa kamrango bak ra∙pajachina mol∙molangaha.
