Shillong songjinmao jiksesa jegrikani a∙selo segipa uni jikgipako chakkuchi su∙aha ine koborna parakataha. Jikgipa janggi joke adita saknaaniko man∙e uni segipa Suresh P Singh ni kosako Laban pulis thanao mokordoma ka∙doangskaaha.
Koborna parakatanigitade jikgipa uamangni demechikna segipako noko jakkalna nanggipa bosturangko brena aganon ua tangka dongja ine aganani a∙selo jegrikna a∙bachengaha. Jikgipa uni tangka dongja ine agananina, segipako gipinna jakkalnade tangka dongoba nokna jakkalnade dongja ine matnangani ja∙mano jegrikani batroroe jikgipako doka sataona sokange chakkuchi su∙aha ine parakataha.
A∙sel ong∙ani somoio ua chrik a∙bokaha aro ia a∙sel ong∙anio uni demechik an∙chirara dake donganiko nikaha ine mokordoma ka∙anio parakangaha. A∙sel ong∙ani bakan ua pulis dolrangna kobor on∙ataha aro uamang uko civil hospitalona sanna bannaniko dakna joljol rimbaaha ine u∙iataha.
